Қазақстанда Салық кодексіне Құрылтай мен Қазақстан Халық Кеңесінің құрылуына байланысты өзгерістер енгізілмек. Ең басты жаңалық – Конституциялық Сотқа жүгіну кезінде төленетін мемлекеттік баж салығын алып тастау ұсынылып отыр, деп хабарлайды Zhaiyqmedia.kz ақпарат агенттігі.
Мәжіліс депутаттары бастамашы болған түзетулер пакеті Парламент қарауына жіберілді. Егер қабылданса, азаматтар өз құқығын қорғау үшін Конституциялық Сотқа тегін жүгіне алады.
«Бұл өзгеріс Конституциялық Соттың қолжетімділігін арттырып, халықтың сот жүйесіне деген сенімін нығайтады», – деді Мәжіліс депутаты.
Сонымен қатар, Құрылтай мен Қазақстан Халық Кеңесінің мәртебесін заңнамалық тұрғыда бекіту көзделген. Бұл органдардың жұмысын реттейтін жаңа нормалар енгізіледі.
