Мазмұнға өту
Сурет: Egemen Qazaqstan
Испания құрамасы футболдан әлем чемпионатының финалында Аргентинаны қосымша уақытта 1:0 есебімен жеңіп, өз тарихында екінші рет әлем чемпионы атанды, деп хабарлайды Zhaiyqmedia.kz ақпарат агенттігі.
Кездесудің негізгі уақытына қосылған үшінші минутта Аргентина жартылай қорғаушысы Энцо Фернандес екінші сары қағаз алып, алаңнан қуылды. Осыдан кейін Испания бір ойыншыға артықшылық алды.
Негізгі уақытта есеп ашылмады. Матч тағдыры қосымша уақытта шешілді. 106-минутта Ферран Торрес соққан гол Испанияға жеңіс әкелді.
Осылайша, Испания құрамасы 2010 жылдан кейін араға 16 жыл салып қайтадан әлем чемпионы атанды. Бұған дейін Луис де ла Фуэнтенің шәкірттері 2024 жылы Англияны 2:1 есебімен жеңіп, Еуропа чемпионатында да топ жарған болатын.
Ферран Торрес әлем чемпионаттары тарихында алаңға қосалқы құрамнан шығып, финалда жеңіс голын соққан екінші футболшы атанды. Бұған дейін мұндай жетістікке 2014 жылы Германия құрамасының ойыншысы Марио Гетце қол жеткізген еді.
Испания құрамасының капитаны Родри әлем чемпионатының үздік ойыншысы атанды. 30 жастағы футболшы турнир барысында сегіз матчқа қатысып, командасының жеңісіне зор үлес қосты.
Франция құрамасының шабуылшысы Килиан Мбаппе чемпионаттың ең үздік сұрмергені атанып, «Алтын бутса» жүлдесіне ие болды. 27 жастағы футболшы турнир барысында сегіз матчқа қатысып, қарсыластар қақпасына 10 гол соқты.
Екінші орынға Аргентина құрамасының шабуылшысы Лионель Месси жайғасты. Ол әлем чемпионатында 8 гол соқты. Үздік үштікті Норвегия құрамасының шабуылшысы Эрлинг Холанд түйіндеді. Оның еншісінде бес матчта соғылған 7 гол бар.
Мбаппе әлем чемпионаттары тарихында екі бірдей мундиальда үздік сұрмерген атанған алғашқы футболшы болды. Ол 2022 жылғы әлем чемпионатында да сегіз гол соғып, «Алтын бутса» жүлдесін жеңіп алған еді. Сонымен қатар француз шабуылшысы әлем чемпионаттары тарихындағы ең үздік сұрмерген атанды. Қазір оның еншісінде 22 матчта 22 гол бар.
Бұл көрсеткіш бойынша Лионель Месси екінші орында тұр. Аргентина капитаны әлем чемпионаттарында 34 матч өткізіп, 21 гол соққан. Айта кетейік, 2026 жылғы әлем чемпионатында Килиан Мбаппе мен Лионель Месси Германия құрамасының аңыз ойыншысы Мирослав Клозеге тиесілі болған 16 голдық рекордты басып озды.
Испания құрамасының қорғаушысы Пау Кубарси әлем чемпионатының үздік жас ойыншысы атанды. 19 жастағы футболшы турнир барысында сегіз матчтың барлығына қатысып, олардың әрқайсысын негізгі құрамда бастап, бірде-бір рет алмастырылған жоқ.
Аргентина құрамасы әлем чемпионаттары тарихында төртінші рет финалда жеңіліс тапты. Бұған дейін аргентиналықтар 1930, 1990 және 2014 жылдардағы финалдарда да жеңіліп қалған еді. Ал 1978, 1986 және 2022 жылдары әлем чемпионы атанды. Осылайша Аргентина құрамасы әлем чемпионатының финалдық бәсекесінде төрт рет жеңіліс тапқан Германия құрамасының антирекордын қайталады.
