Мазмұнға өту
Түркия президенті Режеп Тайып Ердоған Израильдің Таяу Шығыстағы қадамдары аймақтық тұрақтылыққа тікелей қауіп төндіріп отырғанын айтты.
Дохада өткен Ислам ынтымақтастық ұйымы мен Араб мемлекеттері лигасының саммитінде сөйлеген сөзінде ол мұсылман елдерін Израильге қарсы нақты әрі ауыр экономикалық санкциялар қабылдауға шақырды.
Ердоғанның пікірінше, Палестинаны мойындау — дұрыс қадам, бірақ ол шынайы нәтиже беруі үшін қатаң шаралармен бекітілуі тиіс. Түркия басшысы халықаралық құқық аясында Израильдің әрекеттерін сотқа жеткізу қажеттігін де алға тартты.
«Егер қысым жасалмаса, Израиль оккупациялық саясатын жалғастыра береді», — деді ол.
Анкараның өзі бұл бағытта алғашқы қадам жасап, Израильмен сауда-саттықты тоқтатқанын және жылына 9,5 миллиард доллардан бас тартқанын мысалға келтірді.
