Сурет: istockphoto.com
Астанада балалардың қатысуымен болатын жол-көлік оқиғаларының саны күрт артқан. Полиция департаментінің дерегінше, жыл басынан бері кәмелетке толмағандардың қатысуымен 311 жол апаты тіркелген, бұл өткен жылмен салыстырғанда 36,4 пайызға көп. Оқиғалар салдарынан 412 бала жарақат алып, екі бала қаза тапты, деп хабарлайды Zhaiyqmedia.kz ақпарат агенттігі.
Құқық қорғау органдарын әсіресе жас велосипедшілердің қатысуымен болатын апаттардың көбеюі алаңдатып отыр. Биыл мұндай 52 оқиға тіркеліп, көрсеткіш 20,9 пайызға өскен. Соның салдарынан бір бала қаза тапты. Полиция қала көшелерінде жасөспірім велосипедшілерді қағып кету деректерін мысалға келтірді.
Ведомство өкілдерінің айтуынша, қайғылы оқиғалардың негізгі себептері – балалардың жол қозғалысы ережелерін жеткілікті білмеуі, ата-аналардың салғырттығы, жолды белгіленбеген жерден кесіп өтуі және велосипедтен түспей жаяу жүргіншілер өткелінен өтуі.
Тәртіп бұзушылықтардың алдын алу үшін полиция әкімшілік бақылауды күшейткен. Жыл басынан бері 16 жастан асқан 70-тен астам жасөспірім әкімшілік жауапкершілікке тартылды.
