Мәжілісте «AMANAT» партиясының депутаты Әбутәліп Мүтәлі Қазақстанның транзиттік әлеуетін арттыру үшін бірыңғай логистикалық экожүйе құруды ұсынды, деп хабарлайды Zhaiyqmedia.kz ақпарат агенттігі.
Депутаттың айтуынша, қазіргі кезде көлік-логистика саласындағы үйлесімсіздік транзиттік әлеуетті толық пайдалануға кедергі келтіріп отыр. Ол бірыңғай цифрлық платформа мен ортақ стандарттар енгізу арқылы жүк тасымалын жеделдетуге болатынын атап өтті.
«Бізге әртүрлі көлік түрлерін біріктіретін, тасымалдаушылар мен клиенттер арасындағы өзара іс-қимылды жеңілдететін экожүйе қажет. Бұл Қазақстанның Еуразиядағы транзиттік хаб ретіндегі рөлін күшейтеді», – деді Мүтәлі.
Депутат бұл бастаманы жүзеге асыру үшін мемлекеттік органдар мен жеке сектордың бірлесіп жұмыс істеуі маңызды екенін жеткізді. Ол сондай-ақ, Батыс Қазақстан өңірінің транзиттік дәліздердегі маңызына тоқталды.
