Президент Қасым-Жомарт Тоқаев орта білім беруге жасанды интеллектіні енгізу жөніндегі Жарлыққа қол қойды. Құжатта шағын жинақты ауыл мектептерін қолдауға басымдық берілген, деп хабарлайды Zhaiyqmedia.kz ақпарат агенттігі.
Жарлық бойынша, еліміздің білім беру жүйесіне цифрлық технологияларды енгізу жеделдейді. Атап айтқанда, жасанды интеллект көмегімен оқу үдерісін жекелендіру және мұғалімдердің жүктемесін азайту көзделген.
Ауыл мектептеріне ерекше назар аударылып отыр. Ондағы балалардың қалалық оқушылармен тең дәрежеде білім алуына жағдай жасалмақ. Бұл үшін заманауи цифрлық платформалар мен интерактивті оқу құралдары енгізіледі.
«Біздің басты мақсатымыз – әрбір баланың сапалы білімге қол жеткізуін қамтамасыз ету. Әсіресе, шалғайдағы шағын жинақты мектептерге айрықша көңіл бөлінуі тиіс», – деді Мемлекет басшысы.
Жарлықты жүзеге асыру үшін Үкіметке бірқатар тапсырма жүктелді. Оның ішінде арнайы жол картасын әзірлеу және қажетті қаржыландыру көздерін айқындау бар.
