Қазақстанның бірнеше өңірінде ауа райы күрт өзгереді. Синоптиктер жаңбыр, бұршақ және шаңды дауыл болатынын ескертеді, деп хабарлайды Zhaiyqmedia.kz ақпарат агенттігі.
Қазгидромет мамандарының болжамынша, бүгін еліміздің батыс, солтүстік және орталық аймақтарында найзағай ойнап, нөсер жаңбыр жауады. Кей жерлерде бұршақ пен шаңды дауыл соғуы мүмкін.
«Атмосфералық фронттардың өтуіне байланысты ауа райы тұрақсыз болады. Жел күшейіп, екпіні 15-20 м/с жетеді», — деді Қазгидромет маманы.
Төтенше жағдайлар департаменті халықты сақ болуға шақырады. Дауыл кезінде ашық алаңда жүрмеу, үй ішінде болу ұсынылады. Жаңбыр мен бұршақтан зардап шекпеу үшін көліктерді жабық тұраққа қойған жөн.
