Мәжіліс депутаты Асхат Аймағамбетов автоматты қоңыраулар мен шетелдік нөмірлерден жасалатын алаяқтық шабуылдардың алдын алу шараларын сұрап, Премьер-министрдің орынбасары Жаслан Мәдиевке сауал жолдады, деп хабарлайды Zhaiyqmedia.kz ақпарат агенттігі.
Депутаттың айтуынша, қазіргі уақытта алаяқтар көбінесе шетелдік нөмірлерден қоңырау шалып, адамдарды алдап, ақшаларын иемденіп жатыр. Бұл мәселе әсіресе қарт адамдар мен сенгіш азаматтарға қауіп төндіреді.
«Автоқоңыраулар мен шетелдік нөмірлерден келетін шабуылдарға тосқауыл қою үшін нақты қандай шаралар қабылдануда? Осы бағыттағы жұмыс қашан толық іске қосылады?» — деп сұрады Аймағамбетов.
Министр Жаслан Мәдиев бұл мәселе бойынша арнайы жұмыс тобы құрылғанын және қысқа мерзімде тиімді шешім ұсынылатынын жеткізді. Оның сөзінше, шетелдік нөмірлерді блоктау және автоқоңырауларды анықтау жүйесін енгізу жоспарлануда.
БҚО тұрғындары да жиі алаяқтық қоңырауларға тап болып жүр. Оралдық зейнеткерлердің айтуынша, кейде күніне бірнеше рет күдікті нөмірлерден қоңырау келеді. Мамандар алаяқтардың айласына түспеу үшін бейтаныс нөмірлерге жауап бермеуге және жеке деректерді ешкімге айтпауға кеңес береді.
