Президент Қасым-Жомарт Тоқаев Конституциялық реформа жөніндегі комиссия құру туралы Жарлыққа қол қойды, деп хабарлайды Zhaiyqmedia ақпарат агенттігі.
Бұл қадам – Мемлекет басшысының наурыз айындағы Жолдауында жариялаған «Жаңа Қазақстанды» құру бағытындағы ауқымды саяси реформалардың бастамасы.
Жаңадан құрылған комиссияның негізгі міндеті – Ата заңға өзгерістер мен толықтырулар енгізу бойынша нақты ұсыныстар әзірлеу. Бұл ұсыныстар елдің саяси жүйесін жаңғыртуға бағытталуы тиіс.
Еске сала кетейік, Тоқаев өз Жолдауында суперпрезиденттік басқару үлгісінен «мықты Парламенті бар президенттік республикаға» көшу қажеттігін атап өткен болатын. Конституциялық реформа осы мақсатты жүзеге асырудың маңызды кезеңі болып саналады.
Комиссияның құрамы мен оның жұмыс регламенті жақын арада бекітіледі деп күтілуде. Оның құрамына беделді заңгер ғалымдар, сарапшылар мен қоғам қайраткерлері кірмек.
Фото: Әлеуметтік желіден
