Астанадағы қоғамдық тамақтану орындарында ит еті сатылып жатыр деген ақпарат расталмады. Қала әкімдігі тексеріс жүргізіп, заңбұзушылық анықталмағанын мәлімдеді, деп хабарлайды Zhaiyqmedia.kz ақпарат агенттігі.
Әлеуметтік желілерде елордадағы кейбір асханалар мен дәмханалар иттің етін пайдаланады деген қауесет тараған еді. Осыған байланысты қалалық санитарлық-эпидемиологиялық бақылау басқармасы мен ветеринария қызметі бірлесіп, жоспардан тыс тексеріс жүргізді.
«Тексеріс барысында қоғамдық тамақтану орындарында ит етін сату немесе пайдалану фактілері анықталған жоқ. Бұл ақпарат негізсіз және жалған», — деді Астана қаласы әкімдігінің ресми өкілі.
Әкімдік тұрғындарды тек ресми дереккөздерге сенуге шақырып, қауесет таратқандарға заң аясында шара қолданылатынын ескертті.
