АҚШ Украинаға Новороссийск портындағы америкалық экономикалық мүдделерге, соның ішінде Қазақстан арқылы тасымалданатын мұнайға қатысты нысандарға соққы бергені үшін дипломатиялық ескерту жасады, деп хабарлайды Zhaiyqmedia ақпарат агенттігі.
Бұл туралы Украинаның АҚШ-тағы елшісі Оксана Стефанишина CNN арнасына берген сұхбатында мәлімдеді. Оның айтуынша, былтыр қарашада Украина қарулы күштерінің шабуылынан кейін АҚШ Мемлекеттік департаменті Киевке ресми түрде ескерту жолдаған.
«Бізге Украинаның Новороссийскіге жасаған шабуылдары Қазақстан арқылы жүзеге асатын кейбір америкалық инвестицияларға әсер еткені туралы ақпарат жетті. Содан кейін Мемлекеттік департаменттен америкалық мүдделерге шабуыл жасаудан аулақ болуымыз керегін естідік», – деді елші.
Еске сала кетейік, былтыр қарашада Новороссийск маңындағы Каспий құбыр консорциумының (КҚК) айлақтарының біріне соққы жасалған болатын. Салдарынан мұнай жөнелту уақытша тоқтап, Қазақстан экспорттық тасымалдарын балама бағыттарға бұруға мәжбүр болды.
Фото: cpc.ru
