Алматы халықаралық әуежайының акционерлер қатарында жоқ компанияға 6,8 миллиард теңге дивиденд төлегені белгілі болды, деп хабарлайды Zhaiyqmedia ақпарат агенттігі.
Бұл заңбұзушылықты Қаржы министрлігі Ішкі мемлекеттік аудит комитетінің мамандары анықтаған. Олар әуежайдың қаржылық қызметіне алдын алу бақылауын жүргізу барысында осындай ірі көлемдегі заңсыздықты әшкереледі.
«Акционер мәртебесі жоқ заңды тұлғаға 6,8 млрд теңге сомасында дивиденд заңсыз төленгені анықталды. Бұл стратегиялық нысанның қаржылық тұрақтылығына әсер етіп, оның активтері мен даму әлеуетін төмендеткен», – делінген ведомство хабарламасында.
Тексеріс нәтижесінде заңсыз аударылған қаражат толығымен әуежай балансына қайтарылды. Қаржы министрлігінің мәліметінше, енді бұл ақша әуе айлағын дамытуға, қызмет көрсету сапасын арттыруға және жолаушылар үшін қолайлы жағдай жасауға бағытталады.
Фото: Әлеуметтік желіден
