Жапония Таяу Шығыстағы тұрақсыздыққа байланысты мұнай импорты үшін Қазақстанға бет бұруы мүмкін. Елдің ірі компаниясы қазақстандық шикізатты сатып алуға басымдық беруге дайын екенін мәлімдеді, деп хабарлайды Zhaiyqmedia ақпарат агенттігі.
Жапонияның ірі INPEX компаниясы Қазақстан мен Әзірбайжаннан келетін шикізатты сатып алушыларға бірінші кезекте бағыттауға әзір екенін жеткізді.
Әңгіме Каспий теңізіндегі Қашаған және Әзер-Шырақ-Гүнешли кен орындарынан өндірілетін мұнай туралы болып отыр. Қазір бұл көлемнің басым бөлігі Еуропаға жөнелтіледі. Алайда жапондық компаниялар тарапынан сұраныс туындаса, жеткізілімдердің бір бөлігі Жапонияға бағытталуы ықтимал.
Жапонияның Қазақстанға назар аударуының басты себебі – Таяу Шығыстан мұнай тасымалдаудағы тәуекелдердің артуы. Yomiuri басылымының жазуынша, қазіргі таңда Жапония тұтынатын мұнайдың 90 пайыздан астамын осы аймақтан алады. Ормуз бұғазы арқылы өтудегі қиындықтарға байланысты ел басшылығы балама бағыттарды іздей бастады.
Дегенмен, бұл жерде логистика мәселесі бар. Қазақстаннан мұнайды айналма жолмен – Қызыл теңіз арқылы немесе Африканы айналып тасуға тура келеді. Нәтижесінде, жүк 35-55 күнде жетсе, Ормуз бұғазы арқылы тасымалдауға небәрі 20 күн кетеді.
Ресми Токио жалпы энергетикалық стратегиясын қайта қарастырып жатыр. Қазақстаннан бөлек, Оңтүстік Америка мен АҚШ-тан шикізат жеткізу нұсқалары да талқылануда.
Фото: Әлеуметтік желіден
