Сурет: Al Jazeera / @Yashraj Sharma
Нью-Делиде «Cockroach Janta Party» («Тарақан халық партиясы») жастар қозғалысының мүшелері лагерь құрып, полицияның талаптарына қарамастан кетуден бас тартты. Олар Үндістанның білім министрі Дхармендра Прадханның отставкаға кетуін талап етуде, деп хабарлайды Zhaiyqmedia.kz ақпарат агенттігі.
Қозғалысты Бостон университетін тәмамдап, елге оралған 24 жастағы Абхиджит Дипке басқарады. Ол әлеуметтік желідегі наразылықты көшеге шығаруды ұйғарған. Жастарды біріктірген басты мәселе — емтихан тапсырмаларының желіде тарап кетуі және қабылдау емтихандарын өткізу кезіндегі заңбұзушылықтар.
Қозғалыстың басталуына Үндістан Жоғарғы сотының төрағасының бір пікірталаста жастарды тарақандармен салыстыруы себеп болған. Дипке бұған X желісінде: «Егер барлық тарақан бірігіп кетсе ше?» деп жауап жазған. Бұл жазба вирусқа айналды. Қазір қозғалыстың Instagram парақшасында 22 миллионнан астам жазылушы бар — бұл билеуші партиядан екі есе көп.
Шамамен 1,4 млрд халқы бар Үндістанның жартысына жуығы 25 жастан кіші. Соңғы айларда емтихан тапсырмаларының таралуы мен қабылдау емтихандарындағы бұзушылықтарға байланысты бірнеше жанжал қоғамда резонанс тудырды.
Нью-Делидегі алғашқы акциядан кейін (6 маусым) наразылықтар Мумбай, Бангалор және Нагпур қалаларына тарады. Қозғалысқа қатысушы 18 жастағы Сачин Кумар бір жыл бойы медициналық емтиханға дайындалған, бірақ тапсырмалар таралып кеткені анықталғаннан кейін нәтижелері жойылған. «Бұл мені күйретті. Студенттер депрессияға түседі, бірақ ешкім мән бермейді», — дейді ол. Кумар оқуын жалғастырмаған, ал өткен демалыс күндері шамамен 1,7 млн талапкер қайта емтихан тапсырғанда ол лагерьде қалуды таңдаған.
Жағдайды ушықтырған тағы бір фактор — алғашқы емтихан мен қайта тапсыру аралығында оннан астам студенттің өз-өзіне қол жұмсағаны туралы хабарлар. Билік Telegram мессенджерінің жұмысын уақытша шектеген, себебі емтихан материалдары сол арқылы таратылған болуы мүмкін. Сыншылар бұл шараны жеткіліксіз деп санайды.
Дели полициясы наразыларды лагерьден шығаруға тырысып жатыр. Қатысушылардың айтуынша, олардың су мен азық-түлікке қол жеткізуіне шектеу қойылған. Алайда лагерьдегілер берілуге ниетті емес.
