Президент Қасым-Жомарт Тоқаев Түркістанда өткен Түркі мемлекеттері ұйымының бейресми саммитінен кейін жиналыс өткізіп, облыс әкімі мен тұрғындарға ризашылығын білдірді, деп хабарлайды Zhaiyqmedia.kz ақпарат агенттігі.
Мемлекет басшысы саммиттің жоғары деңгейде ұйымдастырылғанын атап өтті. Оның айтуынша, шараға қатысушылар Түркістанның қонақжайлылығы мен инфрақұрылымына тәнті болған.
«Түркістан облысының әкімі мен барша тұрғындарға алғыс білдіремін. Сіздердің еңбектеріңіздің арқасында саммит сәтті өтті», – деді Президент.
Саммитке Түркия, Әзербайжан, Қырғызстан, Өзбекстан және Түрікменстан басшылары қатысты. Тараптар экономикалық ынтымақтастық пен мәдени байланыстарды нығайту мәселелерін талқылады.
Тоқаев бұл шараның Қазақстанның халықаралық беделін көтеруге септігін тигізетінін айтты.
