Сурет: Шахмат федерациясы
Ресейдің Тула облысында мектеп оқушылары арасында өткен Азия чемпионатына 12 елден 314 жас шахматшы қатысты. Қазақстан намысын 22 спортшы қорғады. Жарыс осы айдың 2-10 күндері аралығында ұйымдастырылды, деп хабарлайды Zhaiyqmedia.kz ақпарат агенттігі.
6 жас санатында ұлдар мен қыздар бөлек сынға түсіп, медальдар үш дисциплина бойынша – классикалық шахмат, рапид және блиц – сарапқа салынды. 9 отандық спортшы 3 алтын, 10 күміс, 7 қола, барлығы 20 медаль еншіледі.
Астанадан келген 14 жастағы Алдияр Жауынбай Азия чемпионы атағын мерзімінен бұрын қамтамасыз етті (9 мүмкіндіктен 7,5 ұпай), рапидте күміс, блицте қола медаль жеңіп алды. Елордалық Алихан Сағынтаев 11 жасқа дейінгі санатта блицте чемпион атанып, классикалық шахмат пен рапидте екі рет екінші орынға ие болды. Амалия Едрешева 9 жасқа дейінгі қыздар арасында классикалық шахмат бойынша Азия чемпионы атанды, ал рапидте қола медаль жеңіп алды.
Шахмат федерациясының мәліметінше, жүлдегерлердің ең жасы (7 жасқа дейінгілер арасында) Алинур Бауыржан блицте күміс, ал классикалық шахмат пен рапидте екі қола медаль жеңіп алды. Ал Әлімжан Жауынбай 13 жасқа дейінгілер санатында классикалық шахматта күміс, рапидте қола жүлдегер атанса, Әділ Азатжан 15 жасқа дейінгілер арасында классикалық шахматта қола, блицте күміс медаль иеленді.
Қыздар арасында Айару Алтынбек 17 жасқа дейінгі қатысушылар арасында рапид пен блицте күміс жүлдегер атанса, Ақнұр Мамакова 15 жасқа дейінгі санатта рапид пен блицте екі рет екінші орынға ие болды. Ал Акниет Күмісбай 13 жасқа дейінгі қыздар арасында блицте үшінші орын алды.
Бұған дейін Қазақстан әйелдер құрамасы шахмат Олимпиадасында қатарынан екінші рет күміс медаль иеленгені туралы хабарлаған едік.
