Енді шетелдік инвесторлар Қазақстаннан арнайы «Алтын виза» ала алады. Бұл режим ел экономикасына ірі қаржы салғандарға жеңілдіктер мен артықшылықтар береді. Премьер-министр Олжас Бектенов бұл шешім Мемлекет басшысының тапсырмасы аясында қабылданғанын айтты, деп хабарлайды Zhaiyqmedia.kz ақпарат агенттігі.
Жаңа инвестициялық цикл аясында шетелдіктерге арналған визалық режим жеңілдетілмек. Инвесторлар Қазақстанда тұруға және бизнес жүргізуге арнайы рұқсат алады. Бұл шара елге шетелдік капиталды тартуды көздейді.
«Біз инвесторларға қолайлы жағдай жасауымыз керек. «Алтын виза» – олардың Қазақстанға деген сенімін арттыратын маңызды қадам», – деді Олжас Бектенов.
Жаңа ережелер бойынша, инвесторларға жеделдетілген рәсімдер мен салықтық жеңілдіктер қарастырылған. Нақты қанша қаржы салу керек екені әлі жарияланған жоқ. Бірақ мамандардың айтуынша, бұл бастама Орталық Азиядағы бәсекелестікті күшейтеді.
