Сурет: Kazinform
ҚР Мемлекеттік қызмет істері агенттігінің төрағасы Дархан Жазықбай БҰҰ-ның ЖИ-ді басқару жөніндегі алғашқы жаһандық диалогы аясында өткен сессияда сөз сөйледі, деп хабарлайды Zhaiyqmedia.kz ақпарат агенттігі.
Дархан Жазықбай Қазақстанның мемлекеттік басқару жүйесі жасанды интеллект технологияларын тиімді әрі жауапкершілікпен пайдалануға дайын екенін айтты. Оның пікірінше, азаматтардың жасанды интеллектіге деген сенімі мемлекеттің әділ, ашық және есеп берушілік қағидаттарына негізделген.
Мысал ретінде ол e-Qyzmet цифрлық HR-платформасын келтірді. Бұл платформа 80 мыңнан астам мемлекеттік қызметшіні біріктіріп, 400-ден астам цифрлық HR-процесті қамтиды және 100-ден астам мемлекеттік ақпараттық жүйемен интеграцияланған. Мемлекеттік қызметке конкурстық іріктеу толықтай онлайн форматқа көшіріліп, небәрі 5–7 жұмыс күнін алады.
Бұл процестің ашықтығын, бәсекелестігін және объективтілігін қамтамасыз етеді, — деді Дархан Жазықбай.
Ол Integrity by Design қағидатын ұстанатынын атап өтті. Үміткерлердің анонимді деректері, бірыңғай бағалау жүйесі, автоматтандырылған рейтингтер және әрбір шешімнің сандық ізі субъективтілік пен сыбайлас жемқорлық тәуекелдерін азайтады.
Қазір Агенттік кадрлық деректерді талдау үшін жасанды интеллект қолданады, болжамдық құралдарды дамытып, мемлекеттік функцияларға аудит жүргізеді. Жасанды интеллектіні енгізу үш қағидатқа негізделген: қолжетімділік, адам тарапынан бақылау және есеп берушілік.
Жасанды интеллект шешім қабылдауға көмектесе алады, алайда ол адамның жауапкершілігін алмастырмауы тиіс. Қазақстан ашықтық пен тең мүмкіндіктер қағидаттарын ұстанады және өз тәжірибесімен бөлісуге дайын, — деді Дархан Жазықбай.
Қазақстанның мемлекеттік қызметтегі цифрлық HR-шешімдері халықаралық деңгейде танылуда.
