Мазмұнға өту
Сурет: AP Photo
Испания Африканың солтүстігіндегі Сеута автономды қаласында қауіпсіздік шараларын күшейтіп жатыр, себебі заңсыз мигранттардың жаңа жаппай легі қаупі туындады, деп хабарлайды Zhaiyqmedia.kz ақпарат агенттігі.
Испаниялық БАҚ деректеріне сүйенсек, әлеуметтік желілерде 15 тамызда Марокко мен Сеута арасындағы шекараны бұзып өтуге шақырған үндеулер тараған. Осыған байланысты Тарахаль шекаралық толқын тосқауылы маңына арнайы қалқымалы үрлемелі бөгет орнатылып, теңіз арқылы заңсыз өтуге жол бермеу шаралары қабылданды.
Сонымен қатар, Испания Әскери-теңіз күштерінің екі фрегаты Сеута жағалауына жіберілді. Азаматтық гвардия мен Ұлттық полицияның күші арттырылып, құқық қорғау органдары шекараны патрульдеу, мигранттарды анықтау және жақында болған көші-қон дағдарысының мән-жайын тергеу жұмыстарын жалғастыруда.
Сот жүйесінде де қосымша шаралар қабылданды. Сот медицинасы және криминалистика институты қаза тапқандар мен хабар-ошарсыз кеткендердің көп болуына байланысты мамандар санын жетіден 19 адамға дейін көбейтті. Прокуратура төтенше жағдайға байланысты қылмыстық істерді тергеуге қосымша қызметкерлер жіберді.
Еске салайық, 30 шілдеде мыңдаған заңсыз мигрант Африканың солтүстігінде, Мароккомен шекаралас орналасқан Испанияның Сеута қаласына жеткен болатын. Испания Ішкі істер министрлігінің мәліметінше, елге шамамен 72 мың мигрант кірген. Олардың жартысынан астамы корольдік аумағынан шығып кеткен. Мароккодан Испанияның Сеута анклавына заңсыз өтуге әрекет жасау кезінде қаза тапқандар саны 72 адамға дейін жеткен.
Испанияның Сеута анклавына заңсыз өткен шамамен 50 мың мигранттың жартысынан көбі Мароккоға қайтарылды. Соған қарамастан, заңсыз мигранттардың шағын топтары Фнидек жағалауындағы толқын бөгетін айналып өту немесе теңіз арқылы жүзіп өту арқылы Сеутаға жетуді жалғастырып жатыр. Ақпаратқа сәйкес, олар Марокконың қауіпсіздік күштері тарапынан айтарлықтай қарсылыққа тап болмай отыр.
Осыдан кейін Италия Испаниямен арадағы Шенген келісімінің қолданылуын уақытша тоқтатып, теңіз және әуе шекараларын жапты. Сондай-ақ Испания мигранттар легіне байланысты Сеутаға әскер жібергенін де жазғанбыз. Мароккода мигранттардың Сеутаға заңсыз кіру ісіне қатысты 25 адам сотқа тартылды.
