Сурет: Report
Францияда тұрмыс құнының өсуіне және әлеуметтік-саяси ахуалға байланысты наразылық шерулері өтті, деп хабарлайды Zhaiyqmedia.kz ақпарат агенттігі.
Парижде бір уақытта үш түрлі акция ұйымдастырылды: полицияның қару қолдану құқығын кеңейтетін заң жобасына қарсы шеру, балаларға қатысты зорлық-зомбылыққа қарсы халықаралық шеру және «Сары кеудешелілер» қозғалысының митингісі. Шеру Республика алаңынан басталып, Бастилия алаңы арқылы Ұлт алаңына дейін жалғасты. Бастапқыда жағдай тыныш болды.
Франция ішкі істер министрлігінің мәліметінше, күндіз Парижде өткен 55 акцияға шамамен 8,9 мың адам қатысқан. Полиция 23 адамды ұстады, 2 мыңнан астам тексеру жүргізілді.
Әртүрлі бағалаулар бойынша Париждегі наразылыққа жалпы 30-60 мың адам қатысқан. Ел бойынша 50-60 шеру өткізу жоспарланған. Қоғамдық тәртіпті сақтау үшін билік шамамен 70 мың полицей мен жандармды жұмылдырды.
Лион мен Руан қалаларын қоса алғанда, бірқатар елді мекенде жағдай шиеленісіп, наразылық білдірушілер мен полиция арасында қақтығыс болды. Нант қаласында құқық қорғау органдары рұқсат етілмеген акцияға қатысушыларды тарату үшін көзден жас ағызатын газ қолданды. Ал Тулузада шеру негізінен бейбіт өтті.
Наразылық білдірушілер өмір сүру құнының өсуіне қарсылық білдіріп, жалақы мен шәкіртақыны көтеруді, білім беру жағдайын жақсартуды және әлеуметтік құқықтарды қорғауды талап етті. Сондай-ақ құқық қорғау органдары қызметкерлерінің қару қолдануына қатысты заң жобасы да наразылық тудырды.
Жалғасып жатқан шерулер аясында Франция кәсіподақтары 17 қараша, сейсенбі күні жалпыхалықтық ереуіл өткізуге шақырды.
Айта кетейік, Испанияның ондаған қаласында тұрғындар жаппай ереуілге шықты.
