Сурет: Bild
Эбола безгегінен сауыққан адамдар вирусты 6 айға дейін таратуы мүмкін, деп хабарлайды Zhaiyqmedia.kz ақпарат агенттігі.
Бұл туралы Ресей білім академиясы президентінің орынбасары, эпидемиолог әрі академик Геннадий Онищенко мәлімдеді. Оның айтуынша, Эбола қызбасы ауыр өтуімен ғана емес, аурудан айыққан адамның 6 ай бойы инфекция таратуымен де қауіпті.
Эболаның қауіптілігі неде? Адам бұл дерттен жазылып, аман қалғанның өзінде тағы 6 ай бойы Эбола вирусын айналасына жұқтырады, — деді сарапшы.
Конго Демократиялық Республикасы билігі Эбола қызбасының өршуі туралы 15 мамырда хабарлады. Оған әзірге вакцинасы да, арнайы емі де жоқ Бундибуджио штамы себеп болған. Қолда бар мәліметтер бойынша, бұл аурудан өлім-жітім деңгейі 28,8% құрайды.
Ауру жұқтыру деректері көршілес Угандада да тіркелген. Сондай-ақ Конго Демократиялық Республикасынан оралған дәрігерден Францияда Эбола вирусы алғаш рет расталды.
Дүниежүзілік денсаулық сақтау ұйымы инфекцияның жылдам таралып жатқанын мәлімдеді. Мамандардың айтуынша, індетпен күреске қауіпсіздік мәселелері, науқастармен байланыста болған адамдарды анықтаудағы қиындықтар және жергілікті тұрғындардың бір бөлігінің медицина қызметкерлеріне сенімсіздігі кедергі келтіріп отыр.
Ал Африканың ауруларды бақылау және алдын алу орталықтары аймақтағы індетке қарсы күреске шамамен 1,4 млрд доллар қажет деп бағалады.
