Астанадағы LRT жүйесінің №117 «Жібек жолы» станциясы әлі пайдалануға берілген жоқ. Бұл туралы CTS компаниясы мәлімдеді, деп хабарлайды Zhaiyqmedia.kz ақпарат агенттігі.
Компания өкілдерінің айтуынша, станцияға іргелес аумақты абаттандыру жұмыстары әлі аяқталмаған. Сондықтан нысанды уақытша пайдалануға болмайды.
«Қазіргі уақытта станция маңындағы инфрақұрылымды жетілдіру жүріп жатыр. Бұл жұмыстар толық аяқталған соң ғана станцияны ашу туралы шешім қабылданады», — деді CTS баспасөз қызметі.
Еске сала кетейік, LRT жобасы Астанада бірнеше жылдан бері жүзеге асырылып келеді. Бірақ мердігерлердің ауысуы мен қаржыландыру мәселелеріне байланысты жұмыстар бірнеше рет кейінге шегерілген болатын.
