Қазақстанның басым бөлігінде аптап ыстық тұрақтап, өрт қаупі күшейді. Синоптиктер 10 облыста «қызыл» деңгейдегі дауылды ескерту жариялады, деп хабарлайды Zhaiyqmedia.kz ақпарат агенттігі.
«Қазгидромет» мамандарының мәліметінше, ең жоғары қауіп Батыс Қазақстан, Атырау, Маңғыстау, Ақтөбе, Қызылорда, Түркістан, Жамбыл, Алматы, Жетісу және Ұлытау облыстарында тіркелген. Бұл аймақтарда ауа температурасы +35°C-тан +43°C-қа дейін көтерілген.
«Өрт қаупінің жоғары болуына байланысты тұрғындарға ашық алаңда от жағуға, қоқыс өртеуге тыйым салынады. Ерекше күзет режимі енгізілді», – деді ТЖМ өкілі.
Мамандар халықты сақ болуға шақырып, ыстық күндері суды үнемі ішіп, көлеңкеде жүруге кеңес береді. Өрт шыққан жағдайда дереу 101 немесе 112 нөміріне хабарласу қажет.
