Сурет: istockphoto.com
20 қарашадан бастап Қазақстанда жол қозғалысының жаңартылған ережелері күшіне енеді. Кейбір қалалық жолдарда жүк көліктері мен автобустар 90 км/сағ жылдамдықпен жүре алады, деп хабарлайды Zhaiyqmedia.kz ақпарат агенттігі.
Түзетулер Ішкі істер министрінің 2026 жылғы 3 қарашадағы №832 бұйрығымен бекітілді. Бұған дейін елді мекендерде автобустар мен жүк көліктері үшін жылдамдық шегі 50 км/сағ еді. Енді жол белгісі жоғары жылдамдыққа рұқсат берсе, олар белгіде көрсетілген шекпен жүре алады, бірақ ең жоғары рұқсат етілген жылдамдық 90 км/сағ аспайды.
Жаңа ереже бойынша электросамокат жүргізушілері алдымен велосипед жолымен немесе велосипед жолағымен жүруге тиіс. Олар болмаған жағдайда жолдың оң жақ шетімен, оның ішінде маршруттық көлік жолағымен немесе жол жиегімен жүруге рұқсат етіледі. Электросамокаттар бір қатармен қозғалуы керек.
Техникалық сипаттамалары мопедтерге сәйкес келетін электрвелосипедтер осы санаттағы көліктерге арналған талаптарға бағынады: оларды тіркеу, жүргізуші куәлігін алу және тиісті жол қозғалысы ережелерін сақтау қажет болады. Сонымен қатар 14 жасқа толмаған балалардың велосипедпен жолдың оң жақ шетімен немесе маршруттық көлік жолағымен жүруіне қойылған шектеу алынып тасталады.
Жаңа ережелерден елді мекендерде қозғалтқышы қосулы тұрған көлікті тұрғындарға қолайсыздық тудырған жағдайда қоюға тыйым салатын норма алынып тасталады. Алайда бұл аулада көлікті шектеусіз қыздыруға болады дегенді білдірмейді — тұрғын аймақтарда қозғалтқышы қосулы көлікті қоюға қатысты бөлек тыйым сақталады, ал аулалар да тұрғын аймаққа жатады.
Жол қозғалысы ережелерінде алғаш рет пилотсыз көліктерге арналған жеке тарау пайда болады. Онда мұндай көліктердің қай жерде, қандай бағыттармен және қандай жылдамдықпен жүре алатыны, сондай-ақ қай жерге тоқтап, тұраққа қойылатыны белгіленеді. Бұл өзгеріс пилотсыз көліктер 20 қарашадан бастап Қазақстан жолдарында жаппай жүре бастайды дегенді білдірмейді — жаңа талаптар оларды пайдалану тәртібін құқықтық тұрғыдан реттеуге бағытталған.
Еске сала кетейік, Астанада 25 тамыздан бастап электросамокаттардың тротуармен жүруіне тыйым салынды. Оның орнына электросамокат пайдаланушылары велосипед жолдарымен және веложолақтармен жүре алады.
