Сурет: Ақорда
Президент Қасым-Жомарт Тоқаев Шетелдік инвесторлар кеңесінің пленарлық отырысына қатысқан бір топ азаматқа мемлекеттік наградалар тапсырды, деп хабарлайды Zhaiyqmedia.kz ақпарат агенттігі.
Мемлекет басшысы ІІ дәрежелі «Достық» орденімен Еуропа қайта құру және даму банкінің президенті Одиль Рено-Бассо, Ислам даму банкінің төрағасы Мұхаммед Сулейман әл-Джассер, AD Ports Group компаниясының басқарушы директоры әрі бас атқарушы директоры Мұхаммед Жума әл-Шамиси, Citi компаниясының тұтынушылармен жұмыс жөніндегі бас басқарушысы Дэвид Ливингстон, Polpharma компаниясы бақылаушылар кеңесінің төрағасы Ежи Старак, Cameco корпорациясының президенті Тим Гитцель және «Қазақстанның шетелдік инвесторлар кеңесі» қауымдастығының басқарма төрағасы Ерлан Досымбековті марапаттады.
«Қазақстанның шетелдік инвесторлар кеңесі» қауымдастығының директоры Жанна Байдашева «Құрмет» орденімен наградталды.
Президент Қасым-Жомарт Тоқаев Шетелдік инвесторлар кеңесінің 38-ші пленарлық отырысында еліміздің тұрақты даму бағдарын ұстанатынын айтты. Сондай-ақ экономика мен саяси бағытты жаңа талаптарға дер кезінде бейімдеу басты міндет екенін атап өтті.
