Сурет: istockphoto.com
Шығыс Қазақстан облысының әкімдігі мемлекеттік қызметшілердің әлеуметтік желілердегі мінез-құлқына қатысты жадынама жариялады, деп хабарлайды Zhaiyqmedia.kz ақпарат агенттігі.
Құжатта қызметшілердің жеке және ресми аккаунттарын бөлек ұстауы қажет екені атап өтілген. Алайда парақшада «жеке парақша» деген белгінің болуы қызметтік әдеп нормаларын сақтау міндеттемесінен босатпайды.
«Азаматтармен, әріптестерімен және мемлекеттік органдар өкілдерімен көпшілік алдында жанжалға барудан, балағат сөздер, қорқыту, кемсітетін пікірлер жазудан және қызметтік әдеп талаптарына сәйкес келмейтін түрде интернеттегі пікірталастарға қатысудан бас тарту керек», делінген әкімдік хабарламасында.
Сонымен қатар мемлекеттік қызметшілерге мемлекеттік қызмет беделіне нұқсан келтіруі мүмкін немесе жариялауға арналмаған қызметтік ақпараты бар материалдарды әлеуметтік желілерге орналастырмау ұсынылды. Сыбайлас жемқорлыққа қарсы шектеулерге қайшы келетін жарияланымдарға жол бермеу де ескертілді.
«Әлеуметтік желілерде қымбат сатып алуларды, сән-салтанат заттарын, демалысты және басқа да материалдық дүниелерді сатып алудың заңды әрі анық көзі болмаған жағдайда көрсету азаматтар тарапынан орынды сұрақтар туғызып, мемлекеттік қызметшінің беделіне кері әсер етуі мүмкін екенін ескеру қажет», делінген жадынамада.
Егер қандай да бір жарияланымды әлеуметтік желіге орналастыруға қатысты күмән туындаса, оны жарияламаған жөн.
Бұған дейін Ақмола облысында мемлекеттік қызметшілер құмар ойындарға қатысқаны үшін тәртіптік жауапкершілікке тартылған болатын. Олардың біреуі букмекерлік кеңсенің мобильді қосымшасы арқылы жүйелі түрде бәс тіккен. Ойын шотын толықтыруға жұмсаған қаражатының жалпы сомасы 5,7 миллион теңгеден асқан.
