Семей сынақ полигонының тарихы мен Қазақстанның ядролық мұраны еңсеру тәжірибесі халықаралық деңгейде үлкен қызығушылық тудырып келеді.
ҚР Ұлттық ядролық орталығы жыл сайын шетелдік делегациялар, халықаралық ұйым өкілдері, ғалымдар мен журналистерді қабылдайды. Биылдың өзінде Орталыққа 100-ден астам адам келіп, техникалық турлар ұйымдастырылды.
Қонақтар Семей сынақ полигонының тарихына арналған экспозициямен танысып, сынақтардың ауқымы мен полигон жабылғаннан кейін атқарылған жұмыстар туралы ақпарат алды.
Тур барысында радиациялық-экологиялық зертханаларға, ғылыми қондырғыларға және бірегей КТМ материалтану токамагына баруға мүмкіндік берілді. Мұнда қоршаған ортадағы радионуклидтерді зерттеу, радиациялық қауіпсіздікті қамтамасыз ету және термоядролық синтез бағытындағы ғылыми жұмыстар жүргізіледі.
