Сурет: istockphoto.com
Қазақстанда балалардың ішкі туризмін дамытуға арналған Kids Go Free бағдарламасы жұмыс істейді. Оның аясында балаларға тегін әуе билеттерін рәсімдеу мүмкіндігі қарастырылған, деп хабарлайды Zhaiyqmedia.kz ақпарат агенттігі.
Kazakh Tourism басшысы Талғат Ғазизовтың айтуынша, бүгінге дейін бұл бағдарламаны 100-ден астам бала пайдаланған.
«Kids Go Free бағдарламасы штаттық режимде жұмыс істеп тұр. Бүгінгі күнге барлық қаражат бөлінді. Бізде осы бағытта белсенді жұмыс істеп жатқан туристік операторлар тобы бар», деді компания басшысы.
Бағдарлама Қазақстан аумағында демалыс жасаушылар үшін ғана қолданылады. Ең танымал бағыттардың қатарында Алакөл мен Бурабай курорттық аймақтары бар. Ата-аналар демалыс орнын өздері таңдай алады.
Бұған дейін Туризм және спорт министрі Ербол Мырзабосынов 18 жасқа дейінгі балалар ұлттық парктер аумағына тегін кіре алатындығын айтқан болатын.
