Сурет: ашық дереккөз
13 қарашадағы сауда қорытындысы бойынша Brent маркалы мұнайдың баррелі 95,84 доллар, WTI маркалы мұнайдың баррелі 88,56 доллар болды. Апта ішінде екі марканың да құны шамамен 2,5%-ға төмендеді, деп хабарлайды Zhaiyqmedia.kz ақпарат агенттігі.
Жұма күнгі сессияда Brent фьючерстері 0,02%-ға қымбаттап, барреліне 95,84 долларды құрады. Америкалық WTI мұнайының бағасы 0,20%-ға арзандап, барреліне 88,56 долларға төмендеді.
Мұнай нарығына ұсыныстың артуы және әлемдік сұраныстың әлсіреуі туралы алаңдаушылық әсер етті. Бағаның төмендеуіне Халықаралық энергетика агенттігінің (ХЭА) есебі де ықпал етті, онда әлемдік нарықта мұнай ұсынысының артқаны айтылған.
Сонымен қатар АҚШ-тағы статистикалық деректер бағаға әсер етті: импорт көлемінің артуы және жанармайға сұраныстың төмендеуі аясында елде шикі мұнай мен мұнай өнімдерінің қоры көбейген.
Нарық қатысушылары Таяу Шығыстағы жағдайды да бақылап отыр. Ормұз бұғазы маңындағы тұрақсыздық және өңірдегі энергетикалық инфрақұрылым нысандарына шабуылдар туралы хабарламалар мұнай жеткізіліміне қатысты тәуекелдерді күшейтеді.
Еске салайық, 13 қарашада әлемдік шикізат нарығында құбылмалы жағдай қалыптасты: бір күнде бағалы және өнеркәсіптік металдардың барлығының құны өскенімен, соңғы бір айдағы көрсеткіштері әлі де төмен деңгейде. Мұнай бағасы барреліне 100 доллардан төмен саудаланды.
