Сурет: Жайық Пресс
Батыс Қазақстан облысында «Батыс-Азимут 2026» ашық облыстық спорттық бағдарлау жарысы ұйымдастырылды. Оған облыс аудандары мен Орал қаласынан келген 12 команданың 249 қатысушысы қатысты, деп хабарлайды Zhaiyqmedia.kz ақпарат агенттігі.
Жарыс үш күнге созылып, қатысушылар үш қашықтықты – спринт, ұзақ және орташа қашықтықтарды бағындырды. Спорттық бағдарлау – жылдамдық пен ойлау қабілетін қатар талап ететін сайыс. Мұнда картамен жұмыс істеу, дұрыс бағыт таңдау және уақыт қысқанда сабыр сақтау маңызды.
Жарысты ұйымдастырушылар – Батыс Қазақстан облысы әкімдігі білім басқармасының Облыстық балалар-жасөспірімдер туризмі және экология орталығы мен БҚО спорттық бағдарлау федерациясы. Негізгі мақсаттар: осы спорт түрін насихаттау, балалар мен жасөспірімдерді салауатты өмір салтына тарту, спортшылар мен жаттықтырушылардың шеберлігін арттыру, сондай-ақ облыстық құраманы қалыптастыру үшін үздіктерді іріктеу.
Жарысқа 2010-2016 жылдары туған балалар қатысты. Олармен бірге қашықтықты команда жетекшілері – жаттықтырушылар мен тәлімгерлер де өтті. Бұл оларға өз шәкірттерін қолдауға және жеке үлгімен спорттық мінездің, зейіннің және өзіне сенімділіктің маңыздылығын көрсетуге мүмкіндік берді.
Жарысқа ерекше қызығушылықты республикалық және халықаралық жарыстарда тәжірибесі бар эдвайзер ретінде өнер көрсеткен Даут Жанболаттың қатысуы арттырды. Шақырылған мамандардың қатарында спорттық бағдарлаудан 2027 жылғы Азия чемпионатының спортшысы және эдвайзері Даниэль Антонио Перерайра да болды. Олардың қатысуы тәжірибе алмасуға және осы спорт түрінің заманауи даму деңгейімен танысуға қосымша мүмкіндік болды.
Жарыс қорытындысы бойынша бірінші орынды Бәйтерек ауданының командасы жеңіп алды. Күміс жүлдегерлер – Теректі ауданының өкілдері, ал үшінші орынды Қаратөбе ауданының командасы иеленді.
