Сурет: Egemen Qazaqstan
Қарағанды облысындағы Балқаш көпбейінді ауруханасын ауқымды жаңғырту жұмыстары аяқталды. Бұл жұмыстар Мемлекет басшысының тапсырмасы бойынша қайтарылған активтер есебінен жүзеге асырылды, деп хабарлайды Zhaiyqmedia.kz ақпарат агенттігі.
Жаңартылған корпустарда Балқаш, Приозерск қалаларының, Саяқ кентінің, сондай-ақ Шет және Ақтоғай аудандарының тұрғындары диагностика мен ем алудың жаңа мүмкіндіктеріне ие болды. Аурухана 340 төсекке есептелген және барлық негізгі бейінді бөлімшелерді қамтиды. Ауылдық денсаулық сақтауды жаңғырту жөніндегі ұлттық жоба аясында негізгі ғимаратқа ауданы шамамен 1,4 мың шаршы метр жаңа қосымша корпус салынды.
Жаңа корпуста заманауи қабылдау бөлімі орналасқан. Пациенттерге ыңғайлы болу үшін жоспарлы және шұғыл емдеуге жатқызуға арналған бөлек кіреберістер жасалған. Бірінші қабатта екі операциялық бөлме – шұғыл операциялар мен жоғары технологиялық тері арқылы жасалатын араласуларға арналған бөлмелер ашылды. Мұнда жедел жүрек-қан тамырлары аурулары кезінде коронарография мен стенттеу жүргізіледі.
«Пациенттерді диагностикалау және емдеу үшін қосымша жабдықтармен жарақталған заманауи монопландық ангиограф, магниттік-резонанстық және компьютерлік томографтар, MEDRAD Mark 7 Arterion инъекциялық жүйесі, нейрохирургиялық микроскоп және барлық қажетті медициналық бұйымдар сатып алынды», – деді аурухана директоры Серікбол Түсүпбеков.
Қазіргі уақытта ауруханада шамамен 900 қызметкер, оның ішінде 150-ге жуық дәрігер жұмыс істейді. Биыл ұжымға травматолог, екі сәулелік диагностика маманы және екі интервенциялық кардиолог қосылды. Резидентураны аяқтағаннан кейін уролог, хирург және терапевттерді қоса алғанда, тағы бірнеше маманның келуі күтілуде.
Тораңғалық және Шұбартүбек курорттық кенттерінде медициналық пункттер жұмыс істейді. Оларға жергілікті тұрғындармен қатар туристер де жүгіне алады. Медициналық пункттер қажетті мамандармен және медициналық көмек көрсетуге арналған барлық құралдармен қамтамасыз етілген.
