Сурет: CBS News
American Airlines әуекомпаниясының Даллас–Форт-Уэрт – Ньюарк бағытындағы рейсінде жолаушының агрессивті мінез-құлқы салдарынан ұшақ Балтиморға авариялық қонуға мәжбүр болды. Экипаж бен басқа жолаушылар ер адамды пластик қысқыштар мен скотч арқылы орындыққа бекіткен, деп хабарлайды Zhaiyqmedia.kz ақпарат агенттігі.
Оқиға 2026 жылдың 3 қыркүйегінде Ньюаркке бет алған рейсте болды. Ұшақ екі сағаттай әуеде болған соң, жолаушылардың бірі өзін дұрыс ұстамай, агрессия таныта бастаған.
Куәгерлердің айтуынша, ер адамның әрекеті басқа жолаушыларға қауіп төндірген. Бұрын құқық қорғау саласында жұмыс істеген Хуан Мехия оқиға кенеттен басталғанын айтты.
«Бір сәтте тыныштық айқай мен аласапыранға ұласты. Артыма қарасам, оның жанында дәліз жақта отырған жолаушы ер адамды мойнынан ұстап, онымен арпалысып жатыр екен», — деді ол.
Мехия мен тағы бір жолаушы жанжалға араласып, дебоширді тыныштандыруға көмектескен. Стюардесса берген пластик қысқыштар мен скотчты пайдаланып, олар ер адамды орындыққа бекіткен.
Куәгерлердің сөзінше, алдымен стюардесса жағдайды реттеуге тырысқан, бірақ жолаушы оған балағат сөздер айтып, нәсілдік және гомофобиялық сипаттағы сөздер қолданған. Бұл оның әрекетін одан әрі ушықтырған.
Ұшақ бағытын өзгертіп, Балтимор әуежайына қонды. Құқық қорғау органдары ер адамды ұшақтан түсіріп, рейс кейін Ньюаркке қарай жалғастырылды.
ФБР мәліметінше, жолаушы қазір қамауда. Оған штат деңгейінде айып тағылып, тергеу жүргізілуде.
Бұған дейін Қазақстанда да әуе рейстерінде тәртіп бұзған екі ер адам жауапкершілікке тартылған. Екеуі де мас күйінде болып, айналасына кедергі келтірген. Бірі Алматы–Астана бағытындағы рейсте, екіншісі Шымкентте ұшаққа отыру кезінде тәртіп бұзған.
