Сурет: Жайық Пресс
Зачаганск кентіндегі Жәңгір хан көшесінде ұзындығы бес шақырымға жуық орташа жөндеу жұмыстары жалғасуда. Жалпы құны 1,1 млрд теңге болатын жоба екі жылға есептелген, деп хабарлайды Zhaiyqmedia.kz ақпарат агенттігі.
Автомобильдердің жүруін қамтамасыз ету үшін жол жұмыстары төрт бөлек учаскеде ұйымдастырылған. Бірінші бөлік – автоЦОН ауданындағы Айтқұлов көшесінен Бөкейханов көшесіне дейінгі аралық – дайын. Мұнда мердігерлер 650 метр жол төсемін жаңартып, көлік қозғалысы қалпына келтірілді.
Қазіргі уақытта жолшылар медициналық колледж ауданында жұмыс істеп жатыр. Ұзындығы 500 метр болатын бұл учаске бұрыннан жаңартуды қажет еткен: көптеген шұңқырлар қозғалысты қиындатып, жүргізушілерді жылдамдықты төмендетуге мәжбүрлеген. Енді мұнда ірі түйіршікті асфальт төсеу жұмыстары жүргізілуде.
Зачаганск кенті әкімінің орынбасары Абылай Нұрмақовтың айтуынша, жоба Айтқұлов көшесінен Әзірбайжан көшесіне дейінгі аралықты жөндеуді қамтиды. Жұмыстың негізгі көлемі биыл орындалып, аяқталуы 2027 жылға жоспарланған, атап айтқанда, жөнделетін учаскеде асфальттың жоғарғы қабатын төсеу.
– Биыл негізгі жұмыстар жүргізілуде, ал 2027 жылы екінші типті асфальт жабынын орнатуды аяқтауды жоспарлап отырмыз. Мердігер ұйым – «Ануш-Құрылыс» компаниясы, техникалық қадағалауды «Жана Консалтинг ЛТД» жүзеге асырады. Жобаны іске асыруға жергілікті бюджеттен 1,1 млрд теңге бөлінді, – деді Абылай Нұрмақов.
Ағымдағы кезең аяқталған соң мердігер қалған екі учаскені – ұзындығы 750 және 800 метр болатын бөліктерді жөндеуге кіріседі. Кезең-кезеңімен ұйымдастырылған жөндеу көшені толық жаппай, көлік қозғалысын сақтауға мүмкіндік береді. Шектеулер жекелеген учаскелерде жұмыс жүргізілуіне қарай дәйекті түрде енгізіледі.
