Сурет: Жайық Пресс
Теректі ауданында жыл басынан бері негізгі капиталға 31,4 млрд теңге инвестиция бағытталды, ал өнеркәсіп өндірісі 27%-ға өсті, деп хабарлайды Zhaiyqmedia.kz ақпарат агенттігі.
Бұл туралы Өңірлік коммуникациялар қызметі алаңында өткен брифингте аудан әкімі Алия Муханбетжанова әлеуметтік-экономикалық даму қорытындыларын таныстырған кезде айтты. Тартылған қаражаттың 27,2 млрд теңгесі жеке инвестициялар, 4,3 млрд теңгесі бюджет қаражаты.
Аудандық тізілімге жалпы құны 41,8 млрд теңге болатын 24 инвестициялық жоба енгізілген. Олар ауыл шаруашылығы, энергетика, құрылыс және туризм салаларын қамтиды. Жыл басынан 31,4 млрд теңгеге 21 жоба жүзеге асырылып, 60-тан астам жұмыс орны ашылды.
– Инвестиция тарту жұмысы жүйелі негізде жүргізілуде. Жаңа жобаларды іске асыруға, қолданыстағы өндірістерді кеңейтуге және кәсіпкерлікті дамытуға жағдай жасау маңызды. Бұл шаралардың барлығы аудан экономикасын нығайтуға және қосымша жұмыс орындарын құруға бағытталған, – деп атап өтті Алия Муханбетжанова.
Өнеркәсіп саласында да оң динамика байқалады. Тоғыз айда өнеркәсіп өндірісінің көлемі 14 млрд 697 млн теңгеге жетіп, өткен жылдың сәйкес кезеңімен салыстырғанда 27%-ға артты.
Ауданда шағын және орта кәсіпкерліктің 2035 субъектісі тіркелген, оның 1901-і жұмыс істейді. ШОК саласында 4093 адам еңбек етеді.
Агроөнеркәсіп кешені аудан экономикасының маңызды бөлігі саналады. Тоғыз айда ауыл шаруашылығының жалпы өнім көлемі 29,6 млрд теңге болып, өткен жылдың сәйкес кезеңіне қарағанда 8,2%-ға өсті. Оның ішінде өсімдік шаруашылығы өнімі 11,6 млрд теңге, мал шаруашылығы өнімі 17,8 млрд теңгеге өндірілді.
Ауданда 1077 адам жұмыс істейтін 541 шаруа қожалығы бар. Аграрлық сектордың материалдық-техникалық базасы жаңартылып жатыр. Жыл басынан 64 ауыл шаруашылығы құрылымы жалпы құны 3,5 млрд теңгеге 79 техника бірлігі мен 75 жабдық бірлігін сатып алды.
Биыл егіс алаңы 154,2 мың гектарды құрап, өткен жылмен салыстырғанда 2%-ға ұлғайды. Дәнді дақылдарға 57,2 мың гектар, майлы дақылдарға 42,6 мың, мал азықтық дақылдарға 53,8 мың гектар бөлінді. Сондай-ақ картоп, көкөніс және бақша дақылдары өсірілді.
Диқандар 99,6 мың тонна астық, 24,2 мың тонна майлы дақыл, 9,7 мың тонна картоп, 1,7 мың тонна көкөніс және 800 тонна бақша өнімін жинады. Қыстатуға 156,3 мың тонна жоспарға қарсы 199,1 мың тонна шөп дайындалды.
– Мал шаруашылығында да оң динамика сақталуда. 4604 тонна ет, 26 836 тонна сүт және 4,6 млн жұмыртқа өндірілді. Өткен жылмен салыстырғанда ет өндірісі 5,8%-ға, сүт – 6,9%-ға, жұмыртқа – 5%-ға өсті. Ауыл шаруашылығы өнімдерін қайта өңдеуді дамытуға ерекше көңіл бөлінуде. Ауданда көкөніс пен картоп өсіруге маманданған 14 шаруа қожалығы жұмыс істейді. Болашақта қосылған құны жоғары өнім шығаруға мүмкіндік беретін шағын қайта өңдеу цехтарын құру жоспарлануда. Мал шаруашылығы инфрақұрылымын дамыту да жалғасуда. Өткен жылы жеке инвестициялар есебінен Покатиловка және Бекей ауылдарында сою пункттері салынды. Биыл осындай нысан Теректі ауылында салынуда, – деді спикер.
Ауыл халқының табысын арттыру құралдарының бірі – «Ауыл аманаты» бағдарламасы. 2023 жылдан бері ауданда жалпы құны 2,13 млрд теңге болатын 235 жоба қаржыландырылып, 265 жұмыс орны құрылды. Бастамалар мал шаруашылығы, жылыжай шаруашылығы, нан пісіру, құс шаруашылығы, балық шаруашылығы және автокөлікке қызмет көрсету салаларын қамтиды.
Тек 2026 жылы 266,7 млн теңгеге 20 жоба қолдау алды.
Сонымен қатар ветеринариялық қызметтің материалдық-техникалық базасы нығайтылуда. Өткен жылы бес ауылда ветеринариялық пункттердің жаңа ғимараттары ашылды. Қазір Покатиловка, Шалқар, Шағатай және Құмақсай ауылдарында тағы төрт нысанның құрылысы жалғасуда. Құрылыс жұмыстарының дайындығы 95%-ды құрап, оларды жыл соңына дейін аяқтау жоспарлануда.
Мал қорымының құрылысы да жүргізілуде. Биыл сегіз елді мекенде жұмыс басталды. Богдановка, Төңкеріс және Покатиловка ауылдарында олар аяқталды, қалған елді мекендерде нысандарды жыл соңына дейін тапсыру жоспарлануда.
Тұрғын үймен қамтамасыз ету аудан тұрғындары үшін ең өзекті мәселелердің бірі болып қалады. 2026 жылғы 1 қазанда тұрғын үй кезегінде 1853 адам тұр.
Подстепное ауылында 228 пәтерлі 13 көпқабатты тұрғын үйдің құрылысы аяқталды. Жоба 2022 жылдан бері іске асырылып, қазір қажетті құжаттама рәсімделуде. Үйлердің бірінші қабаттарында кәсіпкерлік қызметке арналған үй-жайлар қарастырылған.
