19 ақпанда түстен кейін Қытай мен Қырғызстан шекарасында болған жер дүмпуі Алматы және Жетісу облыстарының тұрғындарына білінді, деп хабарлайды Zhaiyqmedia ақпарат агенттігі.
Төтенше жағдайлар министрлігінің сейсмикалық станциялар желісі жер асты дүмпуін 19 ақпан күні сағат 14:09-да тіркеді. Жер сілкінісінің ошағы Алматы қаласынан оңтүстік-шығысқа қарай 311 шақырым жерде, Қырғызстан мен Қытай шекарасында орналасқан.
Мамандардың дерегінше, жер сілкінісінің магнитудасы 5,3-ке жетіп, 15 шақырым тереңдікте болған. Осының салдарынан Алматы облысының бірнеше ауылының тұрғындары 2-3 балл шамасындағы тербелісті сезген.
Сонымен қатар жер дүмпуі Жетісу облысында да байқалды. Атап айтқанда, Жаркент қаласында 2 баллдық тербеліс тіркелген. Зардап шеккендер мен қираулар туралы ақпарат түскен жоқ.
Фото: Әлеуметтік желіден
