Сурет: ҰОК
Қытайдың Сючжоу қаласында өткен 2026 жылғы триатлоннан Азия чемпионатында Қазақстан құрамасы екі алтын және бір күміс медаль жеңіп алды, деп хабарлайды Zhaiyqmedia.kz ақпарат агенттігі.
Жарысқа Азияның үздік спортшылары қатысып, бірнеше жас санаты бойынша жүлделер таратылды. Алғашқы күні отандық спортшылар екі алтын медальға ие болды.
Астанадан келген Рамазан Айнегов Youth (U17) санатында суперспринт қашықтығында Азия чемпионы атанды. Ол 25:49 уақыт көрсетіп, жапониялық қарсыласынан бір секундқа озып кетті. Қола медаль қытайлық спортшыға бұйырды.
Ақмола облысынан келген Ясмина Бузуртанова U15 санатында чемпион атанды. Ол 30:56 нәтижемен мәреге жетіп, екінші орындағы қытайлық спортшыдан үш секундқа озық болды.
14 маусым күні өткен аралас эстафетада Қазақстан құрамасы күміс медаль жеңіп алды. Команда құрамында Алуа Нұрмұхамет (Астана), Гор Депершмидт (Ақмола облысы), Калерия Шнейдер (Шымкент) және Альхам Мурат (Түркістан облысы) болды.
Жарыс қорытындысы бойынша Қазақстан құрамасы екі алтын және бір күміс медаль жеңіп алып, жоғары нәтижеге қол жеткізді.
