Бас прокуратура мен «Қазақстандық шетелдік инвесторлар кеңесі» қауымдастығы (ҚШИКҚ) арасында ынтымақтастық туралы меморандумға қол қойылды. Бұл құжат кәсіпкерлердің құқығын қорғау және оларға әкімшілік қысымды азайту мақсатында жасалды, деп хабарлайды Zhaiyqmedia.kz ақпарат агенттігі.
Меморандум аясында прокуратура мен инвесторлар кеңесі бірлесіп, бизнес өкілдеріне қатысты қылмыстық істердің санын қысқартуға күш салмақ. Соңғы үш жылда кәсіпкерлерге қатысты қылмыстық істер саны 4 есеге азайған. Бұл – мемлекеттік органдардың бизнесті қорғау бағытындағы нақты нәтижесі.
«Біздің басты мақсатымыз – заң үстемдігін қамтамасыз ету және кәсіпкерлердің құқығын қорғау. Меморандум бұл бағыттағы жұмысты жүйелі етеді», – деді Бас прокуратура өкілі.
Құжатта прокуратураның кәсіпкерлерге қатысты тексерулер мен қылмыстық істерді қозғау кезінде ашықтықты сақтау міндеттемесі көрсетілген. Сонымен қатар, инвесторлар кеңесі бизнес өкілдерінің мүддесін қорғап, олардың заңды құқықтарын сақтауға ықпал етпек.
Бұл бастама еліміздегі инвестициялық ахуалды жақсартып, шетелдік инвесторлардың сенімін арттыруға септігін тигізеді деп күтілуде.
