Сурет: Egemen Qazaqstan
Балаларды қорғау күніне орай Астана, Алматы және Екібастұз қалаларында отандық фильмдер мен анимациялық туындылар тегін көрсетілді, деп хабарлайды Zhaiyqmedia.kz ақпарат агенттігі.
Іс-шараларды «Ш.Айманов атындағы Қазақфильм» киностудиясы жанындағы «Қазақанимация» шығармашылық бірлестігі ұйымдастырды.
Астанадағы Ұлттық әскери-патриоттық орталықта және Екібастұздағы Жастар бастамаларын дамыту орталығында мерекелік ойын-сауық бағдарламаларынан кейін көрерменге толықметражды «Алтын адам» анимациялық фильмі көрсетілді. Бұл туынды батылдық, әділдік, мейірімділік пен отансүйгіштік секілді құндылықтарды дәріптейді.
Алматыдағы «Арман» кинотеатрында көрсетілімдер екі залда қатар өтті. Қызыл залда былтыр жарық көрген қысқаметражды анимациялық фильмдер топтамасы, ал Көк залда балаларға арналған «Жабайы» көркем фильмі ұсынылды. Бұл фильм адам мен жануар арасындағы достық, қамқорлық пен адалдық тақырыптарын қозғайды.
Ұйымдастырушылардың айтуынша, мұндай мәдени іс-шаралар балалардың бос уақытын мазмұнды өткізуге мүмкіндік беріп қана қоймай, ұлттық кино мен анимация өнерін кеңінен насихаттауға бағытталған.
