Мазмұнға өту
Сурет: cpc-online.ru
Каспий құбыр консорциумының теңіз терминалында Қазақстан мұнайын тасымалдайтын екі танкерге дронмен шабуыл жасалды. Шикі мұнайды тиеу тоқтатылды, ешкім зардап шеккен жоқ, деп хабарлайды Zhaiyqmedia.kz ақпарат агенттігі.
Консорциумның мәліметінше, оқиға 19 шілдеде VPU-1 және VPU-3 қондырғыларында жүк тиеу кезінде болған. Шабуылдың нысаны Либерия туы астындағы ASIA және Маршалл аралдары туы астындағы NISSOS IOS танкерлері болды.
ASIA кемесіне «Теңізшевройл» компаниясының мұнайы, ал NISSOS IOS-қа Қашаған Б.В. және «Матен» компанияларының шикізаты, оның ішінде «Қазмұнайгаз» ҰК АҚ-ның қатысуымен тиелген. Бортта халықаралық экипаждар болған.
Шабуыл салдарынан ASIA танкерінде өрт шықты. Оны КҚК авариялық-құтқару күштерін тарта отырып сөндірді.
Мұнай тиеу тоқтатылды. Консорциум қызметкерлері, мердігерлік ұйымдар мен экипаж мүшелері арасында құрбандар мен зардап шеккендер жоқ.
Мұнайдың төгілуі болмады, екі танкер де көтергіштігін сақтап қалды. Қазір мамандар келтірілген залалды бағалайды.
КҚК бұл оқиғаны мақсатты террористік шабуыл деп атады және бұл консорциумның азаматтық инфрақұрылымына қарсы тікелей агрессияның бесінші оқиғасы екенін мәлімдеді.
Каспий құбыр консорциумы мұнайды Теңіз, Қашаған және Қарашығанақ кен орындарынан тасымалдайды. Ұзындығы 1511 шақырым болатын Теңіз — Новороссийск құбыры арқылы Қазақстанның экспорттық мұнайының үштен екісінен астамы өтеді. 2025 жылы ауыстырып тиеу көлемі шамамен 70,5 млн тонна болды.
ҚР Энергетика министрлігі 2026 жылғы 13 қаңтарда Қара теңіз акваториясында, Каспий құбыр консорциумы теңіз терминалы маңында Қазақстанның экспорттық мұнайын тасымалдауға қатысқан екі кемеде тіркелген келеңсіз оқиғалар туралы ақпаратты ресми түрде растаған еді.
