Сурет: Egemen Qazaqstan
Байқоңыр қаласының тұрғыны Threads әлеуметтік желісінде үш жасар ұлын санитарлық авиациямен шұғыл тасымалдауға көмек сұрап, үндеу жазды. Оның айтуынша, бала бесінші қабаттан құлап, бірнеше күн бойы Байқоңыр қалалық ауруханасының жансақтау бөлімінде өте ауыр халде жатыр, деп хабарлайды Zhaiyqmedia.kz ақпарат агенттігі.
Оқыс оқиға 29 маусымда болды. Қазір үш жасар бала өкпені жасанды желдету аппаратына қосылған. Дәрігерлер оған бас миының ауыр жарақаты, мидың ісінуі, DIC синдромы және басқа да ауыр жарақаттар диагнозын қойды. Анасының айтуынша, балада жедел бүйрек жеткіліксіздігі дамып, дене қызуы бірнеше күннен бері 40 градусқа жуық болып тұр.
Әйел Байқоңыр ауруханасының дәрігерлеріне алғыс айтып, олардың ұлын аман алып қалу үшін қолдан келгеннің бәрін жасап жатқанын жеткізді. Алайда бұл медициналық мекемеде баланы одан әрі емдеуге қажетті мамандар мен арнайы жабдық жоқ. Сондықтан анасы баланы санитарлық авиация арқылы Қызылордадағы мамандандырылған ауруханаға шұғыл жеткізу керектігін айтты. Оның сөзінше, медициналық көрсеткіштерге байланысты баланы автокөлікпен тасымалдау мүмкін емес. Бірақ осы уақытқа дейін санитарлық авиация рейсі ұйымдастырылмаған.
«Қазір біз үшін әрбір минут қымбат. Осы үндеуімді назардан тыс қалдырмай, баламның өмірін сақтап қалуға көмектесулеріңізді сұраймын», деп жазды анасы.
Баланың анасы өз сөзінде Денсаулық сақтау министрлігінен, Қызылорда облыстық денсаулық сақтау басқармасынан және өзге де жауапты органдардан баланы тікұшақпен шұғыл эвакуациялау үшін барлық қажетті шараны қабылдауды сұрады. Сонымен қатар ел тұрғындарын жазбаны кеңінен бөлісуге шақырды.
