Бокстан Қазақстан ерлер құрамасының бас бапкері ауысты. Бұл қызметке екі дүркін әлем чемпионы Санжар Тәшкенбайдың жеке бапкері Нұржан Насанов тағайындалды, деп хабарлайды Zhaiyqmedia ақпарат агенттігі.
Бұған дейін ұлттық құрама тізгінін ұстаған Қайрат Сәтжанов денсаулығына байланысты қызметінен босатылды. Ол 35 жылдан астам тәжірибесі бар маман еді.
«Қазақстан Республикасының еңбек сіңірген жаттықтырушысының жетекшілігімен ерлер командасы халықаралық турнирлерде көптеген жеңіске жетіп, әлем чемпионаттарында медаль жеңіп алды. Отандық бокс қауымдастығы атынан Қайрат Тұрсынханұлына алғысымызды білдіреміз!» – делінген ресми хабарламада.
50 жастағы Нұржан Насанов бапкерлік мансабын 2016 жылы бастаған. Ол – екі дүркін әлем чемпионы атанған Санжар Тәшкенбайды дайындаған маман.
