Сурет: Egemen Qazaqstan
Қасым-Жомарт Тоқаев Владимир Путинді Ресейдің мемлекеттік мерекесі – Ресей күнімен құттықтады, деп хабарлайды Zhaiyqmedia.kz ақпарат агенттігі.
Жеделхатта Қазақстан бауырлас Ресеймен стратегиялық серіктестік және одақтастық рухында достық әрі тату көршілік қарым-қатынасты жоғары бағалайтыны айтылған. Сондай-ақ Путиннің Қазақстанға жасаған мемлекеттік сапары айрықша мәнге ие екені, оның нәтижесі өзара тиімді ынтымақтастықтың көкжиегін кеңейтіп, ауқымды жобалар мен бастамаларға серпін бергені атап өтілген.
Бірлескен күш-жігеріміздің арқасында Қазақстан мен Ресей арасындағы мемлекетаралық байланыстар алдағы уақытта барлық салада қарқынды дами береді деп сенемін, – делінген жеделхатта.
Қасым-Жомарт Тоқаев Владимир Путиннің Ресей Федерациясының игілігі мен өркендеуі жолындағы жауапты мемлекеттік қызметіне табыс тіледі.
