Сурет: Egemen Qazaqstan
26 маусымда Қазақстанның мемлекеттік орман қоры аумағында 13 орман өрті тіркелді, деп хабарлайды Zhaiyqmedia.kz ақпарат агенттігі.
Экология және табиғи ресурстар министрлігінің баспасөз қызметінің мәліметінше, бір өрт Ақмола облысында, тағы бірі Шығыс Қазақстан облысында болған. «Семей орманы» мемлекеттік орман табиғи резерваты аумағында 9 өрт ошағы, ал «Ертіс орманы» резерватында 2 өрт тіркелген.
Барлық өрт ошақтары уақытылы анықталып, орман күзеті қызметі мен «Қазавиаорманқорғау» республикалық мемлекеттік қазыналық кәсіпорнының бірлескен күшімен жедел оқшауланды.
Ведомствоның хабарлауынша, «Семей орманы» және «Ертіс орманы» резерваттарының аумағында найзағайлы ауа райы байқалған. Осыған байланысты орман күзеті бөлімшелері жоғары дайындық режиміне көшірілді.
Министрлік өрт қаупі жоғары кезеңде тұрғындарды өрт қауіпсіздігі ережелерін қатаң сақтауға және табиғатқа ұқыпты қарауға шақырды.
