Орал қаласындағы «Атамекен» өнер ордасында Қазақстан халқы тілдері күніне арналған мерекелік іс-шара өтті. Салтанатты жиынға облыс әкімі Нариман Төреғалиев, зиялы қауым өкілдері, қоғам белсенділері мен жастар қатысты.
Өз сөзінде аймақ басшысы бұл мерекенің ел бірлігін, мәдени әртүрлілікті және мемлекеттік тілдің мәртебесін айқындайтын күн екенін атап өтті. Сонымен қатар, тілдер мерекесінің ұлт ұстазы, қазақ әліпбиінің реформаторы Ахмет Байтұрсынұлының туған күнімен тұспа-тұс келуі халқымыздың ұлы тұлғасына деген ерекше құрметтің белгісі екенін айтты.
Соңғы жылдары өңірде мемлекеттік тілдің қолданылу ауқымы кеңейіп келеді. Облыстық білім басқармасының мәліметінше, соңғы үш жылда 3 мыңға жуық тұрғын тегін қазақ тілі курстарында білім алған. Оның ішінде тыңдаушылардың 40 пайызы түрлі этнос өкілдері. Қазіргі таңда балабақшадағы бүлдіршіндердің 80 пайызы, мектеп оқушыларының 70 пайызы мемлекеттік тілде білім алуда. Ал жалпы халықтың мемлекеттік тілді меңгеру деңгейі 86 пайызға жеткен.
Мерекелік кеште өнер ұжымдары ұлттық әндер мен билерді орындап, жас өрендер патриоттық тақырыптағы өлеңдер оқыды. Шараға жиналғандар қазақ тілінің мәртебесін көтеруге бағытталған бастамаларды қолдайтынын білдіреді.
