Қостанай облысындағы «Соколовская» шахтасында жарылыс кезінде скрепер лебедкасының машинисі жараланды, деп хабарлайды Zhaiyqmedia ақпарат агенттігі.
Eurasian Resources Group өкілдері жағдайды растады. Олардың мәліметінше, шахтада кен жыныстары тұрып қалған соң жарылғыш зат қолданылған.
«Соколов-Сарыбай кен-байыту өндірістік бірлестігінің машинисі жарылғыш затпен жұмыс істеген сәтте күтпеген жарылыс болып, жарақат алды. Қазір ол қалалық ауруханада ем қабылдап жатыр», – деді компаниядағылар.
Оқиғаға байланысты полиция қылмыстық іс қозғады. Тергеу барысында еңбек қауіпсіздігі талаптарының сақталуына баға беріліп, оқиғаның мән-жайы анықталмақ.
