Сурет: pixabay
Энергетика министрлігі Орынбордағы газ өңдеу зауытына жасалған шабуылға байланысты пікір білдірді. Ведомство елдің газбен қамту жүйесі қалыпты жұмыс істеп жатқанын атап өтті, деп хабарлайды Zhaiyqmedia.kz ақпарат агенттігі.
Энергетика министрінің кеңесшісі әрі ресми өкілі Әсел Серікбаеваның айтуынша, диспетчерлік қызметтер газ жеткізу логистикасын жедел түзетіп, қарсы бағыттағы газ көлемдерін баламалы маршруттар арқылы жеткізуді ұйымдастырған.
Отын көлемі басқа көздер есебінен үздіксіз қамтамасыз етіліп отыр. Қазақстанның газ инфрақұрылымы штаттық режимде жұмыс істеп тұр. Ішкі нарық энергия ресурстарымен толық қамтамасыз етілген. Жағдай министрлік пен ұлттық оператордың тұрақты бақылауында, — деді ол.
Бұған дейін украиналық дрондардың Орынбор облысындағы газ өңдеу зауытына шабуыл жасағаны хабарланған еді. Өңір губернаторы Евгений Солнцев өнеркәсіп нысанының үстінде бірнеше ұшқышсыз аппараттың атып түсірілгенін мәлімдеді.
Оқиғадан кейін Орынбор, Орск және Ясный қалаларының әуежайларында әуе кемелерін қабылдау мен ұшыруға уақытша шектеулер енгізілді.
