Түркістан облысында екі көлік соқтығысып, салдарынан үш адам қаза тапты, деп хабарлайды Zhaiyqmedia ақпарат агенттігі.
Қайғылы оқиға Қазығұрт – Жібек жолы тасжолында болған. Облыстық полиция департаментінің хабарлауынша, жол апатына Kia және Haval көліктері түскен.
«Алдын ала мәлімет бойынша, Kia көлігінің жүргізушісі рөлге ие бола алмай, қарсы бағытта келе жатқан Haval көлігімен соқтығысқан», – делінген полиция хабарламасында.
Соққының қатты болғаны сонша, үш адам оқиға орнында бірден көз жұмды. Тағы бірнеше зардап шеккен адам түрлі дене жарақатымен ауруханаға жеткізілген.
Қазіргі таңда полиция осы жайтқа қатысты сотқа дейінгі тергеу амалдарын бастады. Оқиғаның толық мән-жайы тергеу барысында анықталады.
Фото: Әлеуметтік желіден
