Бас прокуратура интернет-алаяқтардың жаңа әдісін анықтады: олар Apple және PayPal компанияларының атынан жалған хабарламалар жібереді. Құрбандардың ақшасын ұрлау үшін қолданылатын бұл схема туралы мамандар ескертеді, деп хабарлайды Zhaiyqmedia.kz ақпарат агенттігі.
Алаяқтар құрбандарға Apple немесе PayPal-дан келгендей көрінетін хаттар жібереді. Онда аккаунтқа кіру әрекеті жасалғаны, не төлем қателігі туралы айтылады. Содан соң адамды жалған сілтеме арқылы өз деректерін енгізуге мәжбүрлейді.
Прокуратура мамандары мұндай хаттарға сенбеуге, жеке мәліметтерді ешкімге бермеуге кеңес береді. Егер күмәнді хат келсе, компанияның ресми сайтына өзіңіз кіріп тексеріңіз.
«Алаяқтардың хаттарында грамматикалық қателер көп кездеседі. Сондай-ақ жіберушінің мекенжайы ресми доменге ұқсамайды. Сақ болыңыздар», — деді Бас прокуратура өкілі.
Қазақстандықтар бұған дейін де банк атынан келген жалған қоңыраулардан зардап шеккен. Енді алаяқтар шетелдік брендтерді пайдаланып, жаңа құрбандар іздеп жатыр. Мамандар кез келген күмәнді хатты дереу прокуратураға хабарлауға кеңес береді.
