Мәжіліс депутаттары жұмыскерлердің құқығын қорғауға бағытталған жаңа заңды қабылдады, енді құжат Сенаттың қарауына жіберіледі, деп хабарлайды Zhaiyqmedia ақпарат агенттігі.
Жаңа түзетулерге сәйкес, бірдей лауазымдағы қызметкерлердің ең жоғары және ең төменгі жалақысы арасындағы қатынасты реттейтін норма енгізіледі. Бұл жалақыдағы негізсіз айырмашылықты болдырмауға көмектеседі.
Сондай-ақ жұмыс істемейтін әкелердің жас балаларды күтуге жұмсаған уақыты зейнетақы тағайындау кезінде еңбек өтіліне есептелетін болды.
Жұмыс берушілерге адам штаттық қызметкердің міндетін атқаратын болса, онымен азаматтық-құқықтық сипаттағы шарт жасасуға тыйым салынады. Бұл «жасырын жұмыспен қамту» тәжірибесін тоқтатуды көздейді.
Енді ұжымдық шарттарға өндірістегі жазатайым оқиғалар кезінде жәрдемақы мен өтемақы төлеу туралы тармақтар міндетті түрде енгізіледі.
Сонымен қатар Еңбек министрлігі зиянды өндірістердегі жұмыскерлерге диеталық және профилактикалық тамақ берудің нақты тәртібін бекітеді.
Бұдан бөлек, мәслихаттарға «Құрметті азамат» атағын беру ережелерін ресми түрде бекіту құқығы берілді.
Фото: Әлеуметтік желіден
