БҚО мен Қытай кәсіпкерлері 14 меморандумға қол қойды,-деп хабарлайды Жайықмедиа.кз.
Батыс Қазақстан облысының делегациясы Қытайға жасаған үш күндік сапарын нәтижелі аяқтады. Іскерлік кездесулер қорытындысында 14 меморандумға қол қойылып, екіжақты ынтымақтастықтың жаңа кезеңі басталды.
Келісімдер өңдеу өнеркәсібі, жасыл энергетика, медицина, білім беру және сауда салаларын қамтиды. Делегация шағын және орта бизнес өкілдерінің ұсыныстарына да ерекше назар аударды. Нәтижесінде аймаққа алғашқы зауыт қондырғылары жеткізіліп, құрылыстың басталатыны белгілі болды.
Сонымен қатар Бейжің мен Нанкин қалаларында БҚО-ның инвестиция және сауда өкілдіктері ашылды. Бұл қадам қазақстандық кәсіпкерлерге қытайлық әріптестермен тікелей байланыс орнатып, бірлескен жобаларды жеделдетуге жол ашады.
Облыс әкімі Нариман Төреғалиев Қытайдың ірі компания басшыларымен жеке кездесті. Мәселен, жылдық табысы 4,5 млрд юаньнан асатын Beijing Jinyi Yuanfang холдингі БҚО-ның бірнеше саласына қаржы құюға келісті.
– Мемлекет басшысының тапсырмасына сәйкес, біз өңдеу өнеркәсібіне инвестиция тартуға күш салып отырмыз. Барлық 14 жоба облыстың индустриалды аймағында жүзеге асады, – деді Нариман Төреғалиев.
Жаңа келісімдер Ақжайық өңіріне тың серпін беріп, инвестиция көлемін арттыруға ықпал етпек.
